الأستاذ مصطفى ابو الحديد يوسف ( مدرسة حافظ ابراهيم الابتدائية )
الأستاذ / مصطفى ابو الحديد يوسف يرحب بالسادة الزوار والسادة الزملاء المعلمين وبأبنائنا الطلاب الأعزاء وبأولياء الأمور فى منتداكم المدرسى والعلمى والتعليمى الجديد الذى أنشأناه لأبنائنا ومن أجلكم وعام سعيد على الجميع وبه جميع ما يخص التلميذ من مواد تعليميه وأرقام الجلوس والنتيجه ( نصف العام -- وأخر العام )
والله ولى التوفيق mostafahadid.yoo7.com

انواع الاخشاب الشائعة فى مصر

استعرض الموضوع السابق استعرض الموضوع التالي اذهب الى الأسفل

انواع الاخشاب الشائعة فى مصر

مُساهمة من طرف Admin في الأربعاء أكتوبر 31, 2012 8:41 pm

انواع الاخشاب الشائعة فى مصر
لازم قبل ما ابتدى البوست دة أنوه على الاتى
أولا: جل من لا يسهو
يعنى لو حصل اى سهو او اى غلط من اى نوع احنا بكل ترحيب نقبل التعديل علينا ونقبل انكم تفكرونا

ثانيا : المعلومات اللى هنا مش مقصود بيها الناس المتخصصة فى الخشب او فى التصميم الداخلى بالعكس تماما
المعلومات هنا موجهة للناس اللى معندهاش اى خلفية عن الاخشاب ونوعها واسمها وشكلها
احنا حاولنا نبسط المعلومات على قد ما قدرنا

ثالثا : اهم حاجة احنا محتاجينها أرائكم وأسئلتكم
يالا نبتدى .. نقول بسم الله

الخشب هانقسمه الى قسمين رئيسيين

اولا: الاخشاب الطبيعية ( زى الزان والارو والموسكى..الخ)
ثانيا: اخشاب مصنعة او اخشاب مسطحات( الكونتر وال إم دى إف والابلاكاج ..الخ)

اولا: الاخشاب الطبيعة

وفى البوست دة هانتكلم عن ثلاث أنواع فقط من اشهر انواع الخشب فى مصر واللى بيكثر استخدامها فى المنازل والمكاتب والمحلات والفنادق وفى كل مكان

اولا: خشب الموسكى pine wood
دى صورته عشان تبئوا عارفينه
هو اكتر حاجة بتميز النوع دة من الخشب وجود العقد فيه

خشب الموسكى يعد من ارخص انواع الاخشاب الطبيعة فى مصر وطبعا كل ما العقد كترت فيه سعره يقل اكتر وخاصة العقد الخبيثة اللى هى ممكن تقع منه بعد التصنيع وطبعا ساعتها هايكون شكل المنتج النهائى سىء للغاية.

يعنى مثلا لو تم تصنيع ضلف مطبخ من الموسكى ذو العقد الخبيثة وبعد كدة العقد وقعت طبعا شكل الضلفة هايكون بشع وهى مخرومة
طيب والواحد يعرف العقد الخبيثة من العقد الطيبة ( الحميدة) ازاى؟؟

العقد الخبيثة بتكون سودة جدا كأنها محروقة وحواليه فراغ بسيط بينها وبين باقى لوح الخشب
لكن العقد اللى مافيش منها خوف هى العقد الفاتحة زى اللى فى الصورة اللى فوق


دى صورة لكنبة مصنوعة من خشب الموسكى ولو تلاحظوا العقد اللى فيها بسيطة ومع الدهان تقريبا مش باينة بالعكس بتزيد الخشب جمال


ودى ترابيزة مطبخ بالكراسى من خشب الموسكى وبرضه العقد اللى فيها بتديها جمال

ويستخدم خشب الموسكى قليل العقد فى صناعة غرف السونا ولكن يفضل فى صناعتها الخشب العزيزى

ومن اشهر استخدامات خشب الموسكى فى مصر ملل السراير والمطابخ وبعض انواع الانتريهات والابواب
==========


ثانيا: الخشب الزان


دة شكل الخشب الزان
ولو تلاحظوا ان لونه مائل للإحمرار شوية ومسامة ضيقة جدا ومافيهوش اى عقد
وخشب الزان مفضل جدا عند المصريين لانهم بيعتقدوا انه اقوى الانواع


وتلاقى الواحد يجيب الانتريه وفخور اوى انه من خشب الزان لانه خشب بيستحمل ويوقلك خد راحتك فى القعدة واتجعص على الاخر دة خشب زان ولا يهمك


المهم ان فى منطقة زى المناصرة فيه نوع تانى من الاخشاب انا مش فاكرة اسمه دلوقتى تقريبا اسمه مرانتى هو شبه الزان وللأسف مش اى حد يفرقهم عن بعض وبيستخدم فى صناعة غرف النوم وطبعا هو مش بقوة خشب الزان وبالتالى الغرفة لاتصمد كثيرا


طيب والمشترى العادى يعرف الفرق ازاى؟؟
بصراحة هو صعب لكن ممكن عن طريق سعر الغرفة اللى هاتشتريها سواء نوم او سفرة او انتريه


يعنى مثلا فى زماننا دة لا يمكن اى غرفة نوم مصنوعة من الخشب الزان تقل عن 10000 ج بأى حال من الاحوال وطبعا دة سعر رخيص جدا اللى انا بقوله دة وبالتالى لو غرفة نوم سعرها 7000ج او 8000ج تأكد انها مش زان او على الاقل مش كلها زان



ثالثا: خشب الارو


دى صورته


خشب الارو من الاخشاب الصلبة المتينة والى كمان شكلها حلو وبتدى فخامة

يعنى لو عملنا باب من الموسكى والتانى من الزان والتالت من الارو هتلاقى افخم باب فيهم شكلا هوالباب الارو

خشب الارو اللى مصر نوعين
أرو يوغوسلافى ودة الارخص والسبب ان الرطوبة فيه اكتر
وأرو أمريكى ودة الاغلى لان رطوبته اقل
ويبدأ سعر الارو من 6000ج الى 10000ج للمتر المكعب
وبمناسبة المتر المكعب أحب اقولكم حاجة مهمة
ان لما الواحد يقول متر خشب الارو مثلا 600ج دة معناه المتر المكعب من الخشب وطبعا الكلام دة بينطبق على جميع انواع الاخشاب الطبيعية وبلغة الصنعة نسميه الخشب الماسيف
هانقول مثلا
لما تيتجى تتفق مع نجار او مهندس عشان يعملك كرسى مثلا
ازاى تحسب كمية الخشب الموجودة فى الكرسى دة
مثلا رجل الكرسى ليها طول وعرض وارتفاع مثلا طول الرجل 5 سم وعرضها 5 سم وإرتفاعها 40سم
عشان نعرف كمية الخشب المستخدمة فى رجل الكرسى دة
هانحول السنتيمتر الى متر وتضرب الارقام اللى هاتطلع لك دى فى بعض هتلاقى الناتج اللى طلع لك 0.001ولما تضرب الرقم دة اللى هو واحد من ألف من المتر فى ثمن المتر المكعب للخشب الارو هانقول مثلا 6000ج الناتج النهائى هايكون 6ج يعنى سعر رجل الكرسى تساوى 6ج
وبالطريقة دى تقدر تحسب اى حاجة ومحدش يضحك عليك

فى نقطة تانية مهمة جدا فى الاخشاب الا وهى الرطوبة
يعنى ايه رطوبة الخشب؟
لما نقول ان قطعة الخشب دى مرطبة يعنى فيها ميه ووزنها بيكون اتقل من وزن مثيلاتها المجففة
وطيب ايه مشكلة الخشب اللى فيه رطوبة ؟
المشكلة انه ممكن يلف يعنى يتقوس وبالتالى المنتج هايبوظ وممكن يتشقق بعد الدهان وبالتالى الدهان هيبوظ
طيب واحنا نعرف ازاى ان الخشب دة فيه رطوبة
طبعا هو بالنسبة لغير المتخصصين بيكون مش سهل
لان فيه جهاز لقياس درجة رطوبة الخشب وطبعا دة بيستخدم فى المصانع الكبيرة لان المصانع دى بتشترى كميات كبيرة من الخشب بالالاف الجنيهات وبالتالى لازم تطمن على الخام قبل التصنيع
بس ممكن وانت بتشترى الخشب من المغلأ وهو المكان اللى بيتباع فيه الاخشاب تسأل اذا كان عندهم جهاز قياس رطوبة وطبعا اغلبهم بيكون عنده لان المغلأ هو كمان بيشترى كميات كبيرة
واهم حاجة لما تقيس الرطوبة انها ماتزيدش عن 16

_________________
اللهم يا غنى يا حميد.. أغننا بحلالك عن حرامك.. وبطاعتك عن معصيتك.. وبفضلك وجودك وكرمك عمن سواك.

اللهم من عمل على عزة الإسلام والمسلمين فأعزه.. ومن عمل على ذلة الإسلام والمسلمين فأذله.

اللهم أذله في الدنيا والآخرة بقوتك وجبروتك يا جبار.

اللهم إنك عفو كريم تحب العفو فاعف عنا.

اللهم أنك عفو كريم تحب العفو فاعف عنا
avatar
Admin
Admin

عدد المساهمات : 187
السٌّمعَة : 1
تاريخ التسجيل : 17/08/2011
العمر : 55

معاينة صفحة البيانات الشخصي للعضو http://mostafahadid.chiefs.tv

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى